Azərbaycan Milli Elmlər Akademiyasının Arxeologiya və Antropologiya İnstitutu Ağdərə və Ağdam rayonlarında yeni arxeoloji abidələr aşkar edib.
Ağdərənin Canyataq kəndi yaxınlığında "Dəmirli" Filiz Emalı Kompleksi ərazisində arxeoloji monitorinq zamanı neolit dövrü yaşayış yeri tədqiq edilib.
Canyataq yaşayış yerində yoxlama qazıntısı zamanı neolit dövrünə aid zəngin saxsı nümunələri, çox sayda osteoloji qalıqlar aşkar edilib.
Ehtimala görə, Canyataq oxra tədarükü həyata keçirən bir düşərgə olub. Çoxlu iri daş alət fraqmentləri və oxra qırıntıları bunu sübut edir.
Eyni ərazidə müsəlman qəbiristanlığı da aşkar edilib. İşğal dövründə qəbiristanlıq erməni vandalları tərəfindən dağıdılıb, yerində yol çəkilib.
Orta əsrlər dövrünə aid tikili qalıqları və saxsı nümunələr tapılıb. Şirli keramika XI-XV əsrlərə aid edilir.
Ağdam rayonunun Göytəpə kəndi yaxınlığında Eyvazxanbəyli qəbiristanlığında hicri 1343-cü ilə aid türbə qeydə alınıb.
Türbə altıguşəli plana malikdir, bu tip memarlıq Azərbaycanın orta əsr memarlığında nadir hallarda rast gəlinir.
