Azov dənizində hücuma məruz qalmış gəmilərdəki Azərbaycan vətəndaşlarının cənazələri ölkəyə gətirilib.
Xarici İşlər Nazirliyi (XİN) məlumat yayıb. Azov dənizində yük gəmilərinə qarşı pilotsuz uçuş aparatı hücumu nəticəsində həlak olmuş 4 nəfər Azərbaycan vətəndaşının nəşləri iyunun 10-da Vətənə gətirilib.
"Faciə nəticəsində həlak olmuş həmvətənlərimizin ailələrinə və yaxınlarına dərin hüznlə başsağlığı veririk", - XİN bildirib.
İyunun 5-də baş verən PUA hücumu zamanı həyatını itirən 1969-cu il təvəllüdlü Qismət Əliyev və 1981-ci il təvəllüdlü Fuad Orucovun cənazələri Azərbaycana gətirilib. Onların nəşləri Yalama Sərhəd-Keçid Məntəqəsindən ölkəyə keçib. Cənazələr bu gün ailələrinə təhvil veriləcək və dəfn mərasimi keçiriləcək.
Xatırladaq ki, iyunun 5-də gecə Azov dənizində "Natra" və "Zirkon" quru yük gəmiləri dronlarla vurulub. Nəticədə 4 Azərbaycan vətəndaşı həlak olub, 4 nəfər yaralanıb. Sağ qalan 19 nəfər heyət üzvü isə dünən axşam ölkəyə qaytarılıb.
