Daxili İşlər Nazirliyinin Kibercinayətkarlıqla Mübarizə Baş İdarəsi (KMBİ) saxta kredit səhifələri yaradan daha iki nəfəri saxlayıb.
Məlumata görə, 20 yaşlı Cəfər Bayramzadə və 23 yaşlı Eynulla Mailov sosial şəbəkələrdə bank və kredit təşkilatlarının rəsmi səhifələrinə oxşar saxta profillər yaradaraq vətəndaşları aldadıblar.
Onlar "aşağı faizli", "sürətli" və "zaminsiz kredit" təklif edərək zərərçəkənlərin kart məlumatlarını ələ keçirib, vəsaitləri oğurlayıblar.
Faktla bağlı cinayət işi başlanılıb, Eynulla Mailov barəsində həbs qətimkan tədbiri seçilib, Cəfər Bayramzadə ilə bağlı istintaq davam edir.
Polis vətəndaşları yalnız rəsmi platformalardan istifadə etməyə və şübhəli linklərdə kart məlumatlarını paylaşmamağa çağırır.
