Azərbaycanın gənc güləşçisi Əli Cavadlı Bolqarıstanın Samokov şəhərində keçirilən U-17 Avropa çempionatında qızıl medal qazanıb.
Bu barədə Azərbaycan Güləş Federasiyası məlumat yayıb. Üçüncü yarış günündə Əli Cavadlı (45 kq) finalda rusiyalı Umar Boqatıryova heç bir şans tanımayıb. Görüşün taleyini ilk hissədə həll edən idmançımız rəqibinə 9:1 hesabı ilə qalib gələrək Avropa çempionu olub.
Hüseyn Mustafazadə (51 kq) təsəlliverici görüşdə isveçrəli Tristan Berneti (9:0), bürünc medal uğrunda görüşdə isə gürcüstanlı Davit Şavadzeni (9:1) vaxtından əvvəl məğlub edərək üçüncü yeri tutub.
Elmir Çərkəzov (60 kq) ilk təsəlliverici görüşdə avstriyalı Lionel Vinteri (9:0) üstələsə də, ikinci görüşdə moldovalı Vlad Duminikaya 0:8 uduzub.
Zöhrab Səfərov isə moldovalı Vladislav Vasilevskiyə 9:0 hesabı ilə qalib gələrək bürünc medal qazanıb.
Beləliklə, millimiz qitə birinciliyini 1 qızıl, 2 gümüş və 3 bürünc medalla başa vurub. 118 xal toplayan yığmamız komanda hesabında Avropa üçüncüsü olub.
