Azərbaycan millisinin baş məşqçisi Ayxan Abbasov Malta və San-Marino ilə yoldaşlıq oyunları öncəsi mətbuat konfransında çıxış edib.
O, komandanın yüksək motivasiyasından danışıb: "Ağır mövsümdən sonra futbolçuların bu qədər istəkli olması sevindiricidir. Həm yaxşı oyun, həm də müsbət nəticə göstərmək istəyirik".
Baş məşqçi Bakı və Avstriyadakı hazırlıqların müsbət təsirindən söz açıb: "Futbolçuların istəyi bizə inam verir. Yoldaşlıq oyunu olsa da, hər iki oyunda qalib gəlmək istəyirik".
Rəqib seçiminə toxunan Abbasov bildirib ki, əvvəlcə oyunları Avstriyada keçirmək planlaşdırılıb, lakin bəzi komandalar təklifi qəbul etmədiyi üçün Malta və San-Marino seçilib.
O, Elvin Cəfərquliyevlə bağlı sualı cavablandırarkən qeyd edib: "Elvin motivasiyalıdır və yaxın vaxtlarda yeni klub tapacaq. O, Millətlər Liqasına qədər oyun praktikası problemi yaşamayacaq".
Qeyd edək ki, yığma iyunun 5-də Malta, 9-da isə San-Marino ilə qarşılaşacaq.
