Azərbaycan şahmatçıları İtaliyanın Montesilvano şəhərində keçirilən dünya çempionatında iki qızıl medal qazanıb.
Azərbaycan Şahmat Federasiyasına istinadən verilən məlumata görə, 14 yaşadək qızlar arasında Zəhra Allahverdi çempion olub. Son turda Türkiyə şahmatçısı Tuana Abakla heç-heçə edən Zəhra 9 xalla qızıl medal qazanıb.
16 yaşadək oğlanlar arasında Xaqan Əhməd də qızıl medal qazanıb. 11-ci turda FIDE təmsilçisi Qleb Şeqlovu məğlub edən Xaqan 9.5 xalla dünya çempionu olub.
83 ölkədən 750-dən çox şahmatçının iştirak etdiyi yarışda Azərbaycan şahmatçıları iki dəfə fəxri kürsünün ən yüksək pilləsinə qalxacaq və onların şərəfinə Azərbaycan Himni səsləndiriləcək.
