Serbiyalı tennisçi Novak Cokoviç kişilərin şəxsi yarışlarında "Böyük Dəbilqə" turnirlərində iştirak sayına görə yeni rekorda imza atıb.
Oxu.Az TASS-a istinadən xəbər verir ki, serbiyalı tennisçi "Rolan Qarros"un ilk mərhələsində fransalı Covani Mpetşi-Perrikarla qarşılaşıb.
Bununla da Cokoviç karyerasında 82-ci "Böyük Dəbilqə" turnirinə çıxaraq tarixi rekord müəyyənləşdirib.
Bu göstərici üzrə əvvəlki rekord isveçrəli Rocer Federer və ispaniyalı Felisiano Lopesə məxsus idi. Hər iki tennisçi nüfuzlu turnirlərdə 81 dəfə iştirak edib.
39 yaşlı Cokoviç hazırda Peşəkar Tennisçilər Assosiasiyasının (ATP) reytinqində dördüncü pillədə qərarlaşıb.
O, ATP-nin himayəsi altında keçirilən turnirlərdə şəxsi yarışlarda ümumilikdə 101 titul qazanıb. Bunlardan 24-ü "Böyük Dəbilqə" turnirlərinin payına düşür ki, bu da kişilərin şəxsi yarışlarında rekord göstəricidir.
Serbiyalı tennisçi həmçinin 2024-cü il Olimpiya Oyunlarının çempionu, 2008-ci il Olimpiadasının bürünc mükafatçısı və 2010-cu il Devis Kubokunun qalibidir.
Cokoviçə dünya bir nömrəsi kimi ən çox həftə keçirmək üzrə də mütləq rekord məxsusdur - 428 həftə.
