Futbol üzrə dünya çempionatının finalında tarixi bir ilk yaşanacaq. ABŞ-nin İst-Raterford şəhərindəki "Metlayf" stadionunda keçiriləcək DÇ-2026 finalının fasiləsində dünya ulduzları səhnə alacaq.
Məlumata görə, final şousunda ABŞ-li müğənni Madonna, kolumbiyalı ulduz Şakira və Cənubi Koreyadan BTS qrupu çıxış edəcək. Bu barədə "Coldplay" rok-qrupu "X" hesabında məlumat yayıb.
Şou iyulun 19-da baş tutacaq. Madonna, Şakira və BTS final oyununun fasiləsində çıxış edən ilk hedlaynerlər olacaqlar.
"Coldplay"in solisti Kris Martinin təşkilatçısı olduğu şou FIFA-nın "Global Citizen" təhsil fondu üçün vəsait toplayacaq. Fond dünya uşaqları üçün keyfiyyətli təhsil və futbola əlçatanlığı yaxşılaşdırmağı hədəfləyir.
