Fransa millisinin baş məşqçisi Didye Deşam 2026-cı il dünya çempionatında komandasının perspektivlərini dəyərləndirib.
Oxu.Az xəbər verir ki, mütəxəssis bu barədə "M6 Info"nun "YouTube" kanalına müsahibəsində danışıb.
"Biz favorit deyilik, amma ora hamını məğlub etməyə gedirik. Demirəm ki, favoritlərdən üstünük, sadəcə hesab edirəm ki, qalan komandaların hamısından güclüyük. Bunu sübut etməyə çalışacağıq. Hər halda zirvəyə çatmaq üçün qarşımıza çıxan hər kəsi məğlub etməliyik. Lider olan ilk üçlüyü tanıyırıq, amma onlardan sonra kimlərin gəldiyini bilmirik. Gəlin diqqətimizi həmin ilk üçlüyə yönəldək. Bu, bir yanaşmadır, amma həyatın da bir hissəsidir", - deyə Deşam bildirib.
2026 FIFA dünya çempionatı iyunun 11-dən iyulun 19-dək ABŞ, Kanada və Meksikada keçiriləcək.
Hazırkı dünya çempionu Argentina millisidir. Argentina millisi 2022-ci il dünya çempionatının finalında Fransa millisi ilə qarşılaşıb. Oyunun əsas və əlavə vaxtı 3:3 hesabı ilə başa çatsa da, penaltilər seriyasında argentinalılar 4:2 hesablı qələbə qazanaraq dünya çempionu olublar.
