2026-cı il dünya çempionatının 1/16 final mərhələsində Belçika millisi Seneqala qarşı oyunda sürrealist rəssam Rene Maqrittin yaradıcılığından ilhamlanmış səfər forması ilə meydana çıxdı.
Açıq mavi rəngli bu forma ilk dəfə 2026-cı ilin martında ABŞ-a qarşı yoldaşlıq oyununda təqdim olunub. Həmin matçda belçikalılar 5:2 hesabı ilə qalib gəlmişdilər.
Formanın arxa hissəsində "Ceci n'est pas un maillot" ("Bu, mayka deyil") ifadəsi yer alıb. FIFA bu yazını kommersiya reqlamentinin pozulması kimi qiymətləndirərək qadağan edib.
Qadağadan yan keçmək üçün yazı formanın daxili hissəsinə - yaxanın altına köçürülüb. Beləliklə, yazı görünməz hala gəlib, amma yenə də formanın üzərində qalıb.
Rene Maqritt XX əsrin ən məşhur rəssamlarından biridir. Onun "Obrazların xəyanəti" tablosu "Ceci n'est pas une pipe" yazısı ilə tanınır.
