ABŞ-nin Nyu-York və Nyu-Cersi ştatlarının baş prokurorları Letisiya Ceyms və Cennifer Devenport, dinamik qiymətlər və aldatma ilə bağlı şikayətlərə görə FIFA-ya qarşı araşdırmaya başladıqlarını elan ediblər.
Oxu.Az-ın RBK-ya istinadən verdiyi xəbərə görə, baş prokurorlar FIFA-ya məhkəmə çağırışları göndəriblər.
"Nyu-yorklular illərlə dünya çempionatının yaxınlıqda keçirilməsini gözləyiblər və onlar münasib qiymətlərlə bilet almaq üçün ədalətli imkana layiqdirlər. Heç kim həddindən artıq qiymətlər ödəmək üçün aldadılmamalıdır", - deyə Ceyms bildirib.
Devenport qeyd edib ki, FIFA bilet satışını "çaşqınlıq, süni qıtlıq və hədsiz yüksək qiymətlər silsiləsinə" çevirib.
Prokurorlar azarkeşlərin şikayətlərini araşdıracaq: yerlərin yenidən bölüşdürülməsi, qiymət artımı və birinci kateqoriya biletlərdə daha bahalı altkateqoriyanın tətbiqi. Kaliforniya ştatının baş prokuroru Rob Bonta da istintaqa başlayıb.
"The Athletic" nəşri azarkeş şikayətlərini dərc edib. Bir azarkeş, Cordan Likover, "Oyun başladıqdan sonra qaydaları dəyişmək olmaz" deyib.
Endryu Svart Sietldə ABŞ-Avstraliya matçına birinci kateqoriya bileti üçün 860 dollar ödəyib, lakin qapı arxası yer alıb. Oxşar hallar digər şəhərlərdə də baş verib.
FIFA 15 stadionda kateqoriya sxemlərini dəyişdirib, lakin bilet satışı ilə bağlı problemlər davam edir. Dinamik qiymətqoyma ilk dəfə tətbiq olunub və qiymətlər əvvəlki dünya çempionatları ilə müqayisədə dəfələrlə artıb. Final matçına bilet qiyməti 33 000 dollara çatıb.
