İran milli futbol komandası tam heyətlə Ankaranın Kanada viza mərkəzinə yollanıb. Eyni zamanda bir neçə oyunçu ABŞ-yə giriş üçün müraciət edib.
Oxu.Az "Reuters" agentliyinə istinadən xəbər verir ki, İran yığmasının qrup mərhələsi oyunları Kaliforniyanın İnqlvud şəhərində (15 iyun Yeni Zelandiya, 21 iyun Belçika) və Sietlda (26 iyun Misir) keçiriləcək.
Əgər komanda pley-offa çıxarsa, iranlılar mübarizəni Kanadada davam etdirəcək.
Türkiyədə ABŞ vizası üçün müraciət edənlər fevralın 28-də ABŞ-nin İrana qarşı hərbi əməliyyatları başlamazdan əvvəl vizanı ala bilməyən oyunçulardır.
ABŞ və İsraillə hərbi əməliyyatlar başladıqdan sonra İranda futbol çempionatı dayandırılıb. Milliyə çağırılan bəzi futbolçular yeddi həftə oyun praktikasından məhrum qalıb.
Hazırda İran yığması DÇ-2026-ya Antalyada hazırlaşır. Mayın 29-da Qambiya ilə yoldaşlıq görüşü planlaşdırılır.
Qeyd edək ki, İran Futbol Federasiyasının rəhbəri Mehdi Tac mayın ortalarında komandanın hələ də ABŞ vizası almadığını bildirib. Məsələ FIFA ilə müzakirə olunacaq.
