Kolumbiyada 13 yaşlı futbolçu Kristian Fabian Rondon Mendes küçə quldurlarının hücumuna məruz qalaraq həyatını itirib.
Hadisə Pyedekuesta şəhərində baş verib. İki naməlum şəxs dostu ilə məşqdən qayıdan məktəblinin qarşısını kəsərək sinəsinə bıçaq zərbəsi endirib.
Cinayətkarlar hücumdan əvvəl yeniyetməyə "bu ərazidən olmadığını" deyiblər. Daha sonra motosikletlə qaçıblar.
Şahidlər dərhal təcili yardım çağırıb. Həkimlər Mendesi xəstəxanaya çatdırsa da, onun həyatını xilas etmək mümkün olmayıb.
Məktəbli yerli "Sportinq" klubunun gənclər heyətində çıxış edib və futbol vunderkindi sayılıb. Anası deyir: "Onun bütün həyatı futbol idi. Ən böyük arzusu Kali şəhərinin "Amerika" klubunda forma geyinmək idi."
Hüquq-mühafizə orqanları cinayətkarları axtarır. Onların yerini bildirən şəxsə 15 milyon Kolumbiya pesosu mükafat vəd edilib.
