Kot-d'İvuar millisinin hücumçusu Elye Vai danışılmış oyun təşkil etməkdə şübhəli bilinərək mayın 29-da Fransada həbs edilib.
Məlumatı "The Athletic" nəşri yayıb. 23 yaşlı futbolçu "Ayntraxt"dan icarə əsasında "Nitsa"da çıxış edir. O, Liqa 1-də "Sent-Etyen"ə 4:1 hesabı ilə qalib gəldikləri matçdan sonra saxlanılıb. Həmin oyunda Vai iki qol vurmuşdu.
Təhqiqat mayın 17-də keçirilən "Nitsa" - "Mets" oyununa edilən şübhəli mərclər, xüsusən də Vainin sarı vərəqə alması ilə bağlı başlayıb. Futbolçu matçın 35-ci dəqiqəsində kobud fəndə görə xəbərdarlıq alıb. Bu, onun mövsümdəki beşinci sarı vərəqəsi olub və "Sent-Etyen"ə qarşı pley-off oyununda iştirak edə bilməməsinə səbəb olub.
Vai dindirmədən sonra sərbəst buraxılsa da, araşdırma davam edir. Marsel prokurorluğu futbolçunu mütəşəkkil fırıldaqçılıq, korrupsiya, cinayət gəlirləri ilə davranma və çirkli pulların yuyulmasında ittiham edir.
Qeyd edək ki, Vai hadisədən dörd gün əvvəl Kot-d'İvuarın 2026 Dünya Çempionatı heyətinə çağırılmış və Ekvadora qarşı oyunda (1:0) start heyətdə meydana çıxmışdı.
