Azərbaycan Tennis Federasiyası məşqçilər üçün vahid və məcburi akkreditasiya sisteminə start verir.
Oxu.Az xəbər verir ki, federasiya tennisin inkişafı, məşqçilik fəaliyyətinin standartlaşdırılması və milli komandalar üçün peşəkar hazırlıq sistemini gücləndirmək məqsədilə bu prosesə başlayır.
Əvvəllər akkreditasiyadan keçmiş məşqçilərin statusu yenidən yoxlanılacaq və peşəkar fəaliyyətlərinin hazırkı tələblərə uyğunluğu qiymətləndiriləcək. Standartlara cavab verənlərin akkreditasiyası yenilənəcək.
Akkreditasiyası olmayan məşqçilərə də federasiyanın müəyyən etdiyi qaydalar əsasında keçmək imkanı yaradılacaq. Məqsəd ölkədə tennis məşqlərinin keyfiyyətini artırmaq, gənc idmançıların düzgün sistem üzrə hazırlanmasını təmin etməkdir.
Akkreditasiyadan keçməyən məşqçilər federasiyanın rəsmi proqramlarında, milli komandaların hazırlıq prosesində və federasiya tərəfindən tanınan inkişaf layihələrində iştirak edə bilməyəcəklər. Valideynlər və gənc idmançılar diqqətli olmalıdır: akkreditasiyadan keçməmiş məşqçilərlə məşq edən oyunçular gələcəkdə milli komandalarda və beynəlxalq yarışlarda çıxış etmək hüququ əldə edə bilməyəcək, həmçinin federasiya dəstəyindən yararlana bilməyəcək.
Buna görə də peşəkar tennis karyerası hədəfləyənlər məşqçi seçimində akkreditasiyadan keçmiş mütəxəssislərə üstünlük verməlidir. Federasiya ilkin mərhələdə akkreditasiyanı ödənişsiz təqdim edir.
Akkreditasiya müəyyən müddət üçün veriləcək və müddət bitdikdən sonra yenidən qiymətləndirmə aparılacaq. Hər il yeni məşqçilər üçün imkan yaranacaq.
Məşqçilər şəxsiyyət vəsiqəsi surəti və məlumatları [email protected] ünvanına göndərməlidir. Əlaqə: +994 55 694 14 66.
