ABŞ, Kanada və Meksikanın birgə ev sahibliyi edəcəyi 2026-cı il Dünya Çempionatına cəmi bir həftə qalıb. Lakin Mexikoda vəziyyət gərgindir. Müəllimlərin həmkarlar ittifaqının təşkil etdiyi kütləvi etirazlar paytaxtı bürüyüb.
Etirazçılar əməkhaqqı artımı, həmçinin sosial ödənişlər və təqaüdlərlə bağlı islahatların ləğvini tələb edirlər. Nümayişçilər bir neçə yerdə yolları bağlayıb, ictimai təhsil idarəsinin binasını yandırıblar.
Ötən günlər isə nümayişçilər Sokalo meydanında fan-zonaya girməyə cəhd edib, polis gözyaşardıcı qaz işlədib. Çempionat üçün qoyulmuş futbolçu heykəlləri aşırılıb və üzərinə yazılar yazılıb. Həmkarlar ittifaqları vandalizmi rədd edib.
Həmkarlar ittifaqı bildirib ki, hökumət güzəştə getməsə, etirazlar çempionat zamanı da davam edəcək. Təqaüdçü hakimlər və məhkəmə işçiləri də pensiya sistemində dəyişiklik tələb edərək aksiyalar keçirib.
Bundan başqa, bir çox yerlərdə tikinti işləri hələ bitməyib. Hava limanı, əsas prospektlər və metro xətlərində təmir işləri sürür.
DÇ-2026 iyunun 11-də başlayacaq. Mexikoda ilk matçda Meksika CAR ilə qarşılaşacaq.
