Azərbaycan minifutbol millisinin üzvü Vüsal İsayev, Serbiya ilə oyunun turnirdəki ən çətin sınaq olduğunu bildirib.
Slovakiyada keçirilən Avropa çempionatında qalib gələn komandanın üzvü, Bakıdakı qarşılanma zamanı jurnalistlərə açıqlama verib.
Vüsal İsayev deyib: "Qrup mərhələsindən sonra güclü rəqiblərlə qarşılaşdıq. Dünya və Avropa çempionlarının olduğu tərəfə düşdük. Hədəfimiz finala yüksəlmək idi. Son dünya çempionu kimi yarışa qatıldıq və məsuliyyətimiz böyük idi."
Federasiyanın yaratdığı şəraitdən danışan İsayev, Bakı və Monteneqroda təlim-məşq toplanışları keçirdiklərini qeyd edib.
Ən çətin oyunun Serbiyaya qarşı olduğunu vurğulayan futbolçu: "Rəqib fiziki cəhətdən çox güclü idi. Uzun illərdir birlikdə oynayırlar və bizi yaxşı təhlil etmişdilər. Öz oyunumuzu tam göstərə bilmədik, penaltilərlə qalib gəldik."
