Azərbaycan minifutbol yığmasının baş məşqçisi Elşad Quliyev final qarşılaşması öncəsi açıqlama verib.
O, bildirib ki, komanda Avropa çempionatının finalında daha yaxşı oyun sərgiləmək niyyətindədir.
Oxu.Az-ın məlumatına görə, Quliyev Slovakiyada keçirilən turnirin yarımfinal matçından sonra fikirlərini bölüşüb.
“Bütün oyunçularımı və xalqımızı təbrik edirəm. Çempion olmaq istəyirik. Serbiya Avropanın ən güclü komandalarından biridir. Çətin oyun oldu. Rəqib üstün oynaya bilər, amma nəticəni biz qazandıq. Finalda daha yaxşı oyun göstərmək arzusundayıq”, – deyə o vurğulayıb.
Baş məşqçi qeyd edib ki, 1/4 finalda Çexiya ilə görüş çox enerji aparıb. “Sabaha hazırlaşmalıyıq. Daha yaxşı oynamaq fikrindəyik. Bir qol hər şeyi həll edə bilər. Hər iki komanda ehtiyatlı idi. Müdafiəni də nəzərə almalı idik. Amma biz müdafiə futbolu oynamırıq”, – deyə o əlavə edib.
Xatırladaq ki, Azərbaycan millisi yarımfinalda Serbiyanı penaltilərlə məğlub edib. Əsas vaxt 1:1 hesabı ilə başa çatıb.
