İyunun 27-də Milli Gimnastika Arenasında keçiriləcək "UFC Fight Night: Fiziev vs. Torres" turnirinə hazırlıqlar davam edir. Bu ərəfədə Azərbaycan idmanının iki ulduzu - UFC döyüşçüsü Nazim Sadıxov və dünya şöhrətli gimnast Tofiq Əliyev görüşüblər.
Görüş Azərbaycan Gimnastika Federasiyasının məşq binasında baş tutub. Nazim Sadıxovun gəlişi gənc gimnastlar üçün sürpriz olub. Onlar UFC döyüşçüsü ilə yaxından tanış olmaq, söhbət etmək fürsəti qazanıblar.
Tofiq Əliyev Nazimə tamblinq idman növünü tanıdıb, öz məşq proqramından nümunələr göstərib. Nazim isə Bakıdakı döyüşə hazırlıq prosesindən danışıb. Hər ikisi bir-birinə uğurlar arzulayıb.
Tofiq Əliyev tamblinq üzrə ən çətin element sayılan üçqat salto və üçqat burulma kombinasiyasını ilk dəfə yerinə yetirən gimnast kimi tarixə düşüb.
Görüşdə idmançılar hədiyyələr də mübadilə ediblər: Nazim Tofiqə UFC əlcəkləri, Tofiq isə Nazimə öz gimnastika ayaqqabılarını bağışlayıb.
Sonda xatirə şəkli çəkdirən idmançıları ortaq məqsəd birləşdirir - Azərbaycanı beynəlxalq arenada layiqincə təmsil etmək.
