Azərbaycan Qış İdman Növləri Federasiyasının idman direktoru İqor Lukanin, fiqurlu konkisürən Aleksandr Plyuşenkonun Azərbaycan yığmasında hansı turnirlərdə debüt edəcəyini açıqlayıb.
Beynəlxalq Konkisürmə İttifaqı (ISU) tərəfindən Azərbaycanın iştirakı ilə iki gənclər Qran-prisi təsdiqlənib. Sentyabrın ortalarında Türkiyədə, ayın sonunda isə Gürcüstanda keçiriləcək yarışlar üçün Saşa (Aleksandr) sifariş ediləcək. Onun çıxış edib-etməyəcəyinə məşqçilər qərar verəcək.
Lukanin, Aleksandrın yığmaya keçidi ilə bağlı danışıqlara aydınlıq gətirib: "Yevgeni ilə 20 ildən çoxdur tanışıq. Onun oğlunun yığmamıza keçidi ilə bağlı söhbət martın sonunda yarandı. Saşa istedadlı və yaxşı potensiala malikdir."
Qeyd edək ki, 13 yaşlı idmançı may ayında Azərbaycan bayrağı altında çıxış edəcəyi məlum olub və Rusiya Fiqurlu Konkisürmə Federasiyasının İcraiyyə Komitəsi buna icazə verib. İyulun 1-də isə ISU-dan rəsmi icazə alınıb. Atası Yevgeni Plyuşenkonun sözlərinə görə, Aleksandr 5 il müddətinə Azərbaycanın idman vətəndaşlığını alıb.
