Azərbaycan çempionu "Sabah"ın Çempionlar Liqasının 1-ci təsnifat mərhələsindəki mümkün rəqibləri dəqiqləşib.
Qitənin ən nüfuzlu klub turnirinin ilkin mərhələsində 28 komanda mübarizə aparacaq. Püşkatmada "Sabah" 14 səpələnməmiş komanda arasında yer alacaq.
Paytaxt təmsilçisinin üz-üzə gələ biləcəyi 13 səpələnmiş komanda məlumdur: "Şemrok Rovers" (İrlandiya), KUPS (Finlandiya), "Drita" (Kosovo), "Linkoln Red İmps" (Cəbəllütariq), "Borats" (Bosniya və Herseqovina), "Vikinqur" (İslandiya), "Kayrat" (Qazaxıstan), "Universitatya Krayova" (Rumıniya), "Riqa" (Latviya), "Klaksvik" (Farer adaları), "Flora" (Estoniya), "Larn" (Şimali İrlandiya), "Petrokub" (Moldova).
Çempionlar Liqasının 1-ci təsnifat mərhələsinin püşkatma mərasimi iyunun 16-da keçiriləcək. Oyunlar iyulun 7-8 və 14-15 tarixlərində baş tutacaq.
