"Səbail" klubunun yeni prezidenti Mirzə Bayrampur komandanın adının dəyişdiriləcəyini açıqlayıb. O, AZƏRTAC-a müsahibəsində bildirib ki, klub Quba şəhər stadionuna köçərsə, "Quba" adlanacaq.
Bayrampur deyib: "Hazırda maliyyə vəziyyəti stabildir. Güclü heyət formalaşdırmaq üçün çalışırıq. Əsas məqsəd çempionluq və Premyer Liqaya yüksəlməkdir."
O, əvvəllər "Şimal" klubunu İkinci Liqadan Birinci Liqaya qaldırdığını, ötən mövsüm "Şahdağ Qusar"da işlədiyini xatırladıb. "Səbail"də hədəf Birinci Liqanı qazanaraq birbaşa Premyer Liqaya vəsiqə qazanmaqdır.
Baş məşqçi Elnur Abdullayev olacaq. Stadionla bağlı iki variant var: ASCO Arena və Quba şəhər stadionu. Danışıqlar yekunlaşır. Köçürmə baş tutsa, klub "Quba" adı ilə çıxış edəcək.
