"Şəfa" futbol klubu yeni loqosunu təqdim edib.
Oxu.Az xəbər verir ki, bu barədə klubdan məlumat yayılıb.
"Bir klub, bir şəhər, bir tarix və bir ailə" devizi ilə hazırlanan loqo klubun keçmişini, bu gününü və gələcəyini birləşdirən güclü simvollardan ibarətdir. Loqonun əsas elementlərindən olan "qala" Bakının tarixi rəmzi İçərişəhəri əks etdirir. "Ulduz" 2000/2001 mövsümündə qazanılan Azərbaycan Kubokunu təcəssüm etdirir və gələcəyə inamı, işığı, mənəvi yüksəlişi simvollaşdırır.
Bildirilib ki, loqodakı "alov" Azərbaycan Dövlət Gerbindən ilhamlanıb, odlar yurdunun tükənməz enerjisini, tərəqqi və inkişafı ifadə edir. "1998" isə klubun təsis ilidir.
Rənglərə gəlincə, Xəzər dənizini əks etdirən "mavi" sarsılmaz güvən, peşəkarlıq, azadlıq və sakitlik rəmzidir. "Ağ" saflıq, təmizlik, ədalət və yeni başlanğıcların simvoludur.
