Kanadanın Toronto şəhərindəki Neytan-Filipps meydanında futbol üzrə dünya çempionatının matçlarının canlı yayımı güclü istilər səbəbindən ləğv edilib.
Oxu.Az xəbər verir ki, bu barədə CTV telekanalı məlumat yayıb.
Kanada Milli Meteoroloji Xidməti iyulun 2-də Torontoda havanın temperaturunun 35 dərəcədən çox olacağını proqnozlaşdırır. DÇ görüşlərinin translyasiyası şəhərin əsas meydanı üçün planlaşdırılmışdı. Meydan meriya binalarının yerləşdiyi və şəhər mərkəzindəki iki mühüm küçənin kəsişməsində yerləşir.
Xatırladaq ki, ABŞ, Kanada və Meksikanın ev sahibliyi etdiyi dünya çempionatı iyulun 19-da başa çatacaq. Tarixdə ilk dəfə 48 yığma bu turnirdə mübarizə aparır. Kanadadakı qarşılaşmalar Toronto və Vankuver şəhərlərində keçirilir. İyulun 2-də keçiriləcək 1/16 final mərhələsində Portuqaliya - Xorvatiya, İspaniya - Avstriya və İsveçrə - Əlcəzair matçları oynanılacaq.
