Albaniyanın "Eqnatiya" klubunda çıxış edən azərbaycanlı futbolçu Zamiq Əliyev çətin vəziyyətlə üzləşib.
Müdafiəçi ötən mövsüm başa çatdıqdan sonra Azərbaycana qayıtsa da, hazırda ölkədən çıxa bilmir. Səbəb Səfərbərlik və Hərbi Xidmətə Çağırış üzrə Dövlət Xidmətinin çağırışı ilə onun ölkədən çıxışına qadağa qoyulmasıdır.
İyunun 8-də Z. Əliyev komandasının yay toplanışına yollanmaq istəyib, lakin hava limanından geri qaytarılıb.
Bunun ardınca Albaniya klubu müdafiəçinin adını Çempionlar Liqası ərizəsindən çıxarıb və məşqlərə qatılmadığı üçün onu 5 min avro cərimələyib.
"Eqnatiya" ən qısa zamanda futbolçunun düşərgəyə qayıtmasını tələb edir. Əks halda klub Əliyevin müqaviləsinə xitam verəcəyini oyunçunun menecerinə bildirib.
