Süni intellektdən istifadəyə dair ölkələrin reytinqində Azərbaycan 62-ci yerdə qərarlaşıb. Ekspertlər bunu başlanğıc nöqtəsi kimi qiymətləndirir.
2026-cı ilin ilk rübü üzrə açıqlanan reytinqdə Azərbaycan 17.7 faiz göstərici ilə 62-ci, Gürcüstan 20.5 faizlə 54-cü, Türkiyə 17.4 faizlə 65-ci, Qazaxıstan 15.9 faizlə 70-ci pillədə yer alıb. Lider BƏƏ-də isə bu göstərici 70.1 faizdir.
Kibertəhlükəsizlik və süni intellekt üzrə ekspert Azər Əlili bildirib ki, 62-ci mövqe nə fəlakət, nə də qənaətbəxşdir, bu, start mövqeyidir. O qeyd edib ki, Azərbaycan Türkiyə və Qazaxıstandan irəlidə, Gürcüstandan isə cüzi geridədir.
Mütəxəssis qeyd edib ki, daha yüksək mövqeyə çıxmaq üçün beş istiqamətdə iş aparılmalıdır: kütləvi maarifləndirmə, Azərbaycan dilində NLP modelləri, nazirliklərdə süni intellekt məsuliyyəti, özəl sektor üçün stimullar və beynəlxalq inteqrasiya.
Azərbaycan İnformasiya və Kommunikasiya Texnologiyaları Sənayesi Assosiasiyasının sədri Elvin Abbasov isə vurğulayıb ki, milli data strategiyası qəbul edilməli və yerli texnoloji həllər təşviq edilməlidir.
