"AZCON Holding"in tərkibinə daxil olan "Azəraeronaviqasiya" Hava Hərəkəti İdarəsi (AZANS) "Airspace World 2026" sərgisində və "CANSO Leadership Summit" sammitində iştirak edib.
AZANS aeronaviqasiya sahəsində beynəlxalq əməkdaşlığı gücləndirmək, əməliyyat dayanıqlılığını artırmaq və gələcəyin hava məkanı həllərini formalaşdırmaq məqsədilə strateji görüşlər və tərəfdaşlıq təşəbbüsləri həyata keçirib.
"Airspace World" dünyanın aparıcı aviasiya platformalarından biridir. Tədbirə 140-dan çox ölkədən, 200-dən artıq şirkət və 10 000-dən çox iştirakçı qatılıb.
AZANS bu tədbirdə stendi ilə təmsil olunaraq Azərbaycanın aeronaviqasiya sistemini və strateji tranzit potensialını nümayiş etdirib.
AZANS beynəlxalq media brifinqində çıxış edərək geosiyasi dəyişikliklər fonunda hava hərəkəti axınlarının transformasiyası və Azərbaycan hava məkanında artan həcmlərin idarə olunması haqqında məlumat verib.
Rəhbərlik həmçinin "Yeni geosiyasi dövrün çağırışları şəraitində hava məkanının gücləndirilməsi" mövzusunda panel müzakirəsində iştirak edib.
Panel çərçivəsində hava məkanının təhlükəsizliyi, mülki-hərbi koordinasiya, rəqəmsal transformasiya və dayanıqlı ATM həlləri müzakirə olunub.
AZANS "DFS Aviation Services", "UK CAAI", "NATS" və "Rohde & Schwarz" kimi beynəlxalq tərəfdaşlarla yeni əməkdaşlıq təşəbbüslərini elan edib.
Razılaşmalar yeni nəsil ATM sistemləri, rəqəmsal transformasiya, təhlükəsizlik idarəetmə sistemlərinin gücləndirilməsi və qabaqcıl beynəlxalq təcrübələrin tətbiqini əhatə edir.
AZANS nümayəndə heyəti ICAO, EUROCONTROL, "HungaroControl", INDRA, "Aireon" və digər təşkilatlarla danışıqlar aparıb.
