Azərbaycan iqtisadiyyat naziri Mikayıl Cabbarov ABŞ dövlət katibinin iqtisadi, enerji və biznes məsələləri üzrə köməkçisi Kaleb Orr ilə görüşüb.
Görüş Bakı Enerji Həftəsi çərçivəsində baş tutub. Tərəflər iqtisadi tərəfdaşlığın strateji prioritetlərini müzakirə ediblər.
Ticarət və investisiya əlaqələrinin genişləndirilməsi, enerji, süni intellekt, rəqəmsallaşma, kritik minerallar və mədənçilik sahələrində əməkdaşlıq nəzərdən keçirilib.
Regional bağlantıların gücləndirilməsinin iqtisadi aktivliyə təsiri vurğulanıb. Azərbaycanın Avropa, Mərkəzi Asiya, Cənubi Qafqaz və Yaxın Şərq üçün platforma rolunun möhkəmləndirilməsi müzakirə olunub.
Tərəflər iqtisadi əməkdaşlığın şaxələndirilməsi, innovativ texnologiyaların tətbiqi və özəl sektor əlaqələrinin gücləndirilməsinin əhəmiyyətini qeyd ediblər.
