Azərbaycanda idxal olunan yanacaq növləri üçün aksiz dərəcələri dəyişdirilib. Baş nazir Əli Əsədovun imzaladığı qərarla, Aİ-92 markalı benzin və dizel yanacağı üçün yeni tariflər müəyyən edilib.
Qərara əsasən, mühərrik benzinləri (aviasiya benzini istisna) və dizel yanacağı üzrə aksiz dərəcələri yenilənib. Qurğuşun miqdarı 0,013 q/l-dən çox olmayan və oktan ədədi 95-dən aşağı olan benzinlər üçün aksiz 1 ton üçün 200 manat təşkil edir. Eyni dərəcə qurğuşun miqdarı daha yüksək olan benzinlərə də şamil edilir.
Dizel yanacağı üçün aksiz dərəcəsi 1 ton üçün 80 manat səviyyəsində müəyyən edilib. Lakin 2026-cı il mayın 1-dən 2027-ci il martın 31-dək olan dövrdə hər iki yanacaq növü üçün aksiz müvəqqəti olaraq 1 ton üçün 1 manat olacaq.
Sənəddə həmçinin SOCAR-ın həmin dövrdə idxal edəcəyi Aİ-92 benzininin həcmi 205 min ton, dizel yanacağının həcmi isə 201 min ton olaraq təsbit edilib. Bu dəyişikliklər yanacaq bazarında qiymət formalaşmasına təsir göstərə bilər.
