Dünya bazarında misin qiyməti bir ton üçün 14 min dolları keçərək tarixi zirvəyə yaxınlaşıb. Artan təchizat riskləri və geosiyasi gərginliklər bu bahalaşmanın əsas səbəblərindəndir.
Çin, dünyanın ən böyük mis istehlakçısı olaraq tələbi canlı saxlayır. Ölkədə elektrik şəbəkələrinin genişlənməsi, bərpaolunan enerji investisiyaları və süni intellekt sektorunun inkişafı misə tələbatı artırır.
İqtisadçı Pərviz Heydərova görə, misin bahalaşması zəncirvari reaksiya ilə bir çox məhsulun qiymətini artıracaq. Elektrotexnika, məişət texnikası, avtomobil sənayesi və tikinti sektoru bu artımdan ən çox təsirlənən sahələrdir.
Geosiyasi gərginliklərin azalması böhranın həlli üçün vacibdir. Xüsusilə Yaxın Şərqdə və Hörmüz boğazındakı təhdidlər aradan qaldırılmalıdır.
Azərbaycan üçün müsbət tərəf isə mis ixracatçısı olmasıdır. Qiymətlərin yüksəlməsi ölkəyə xarici valyuta gətirir və büdcə gəlirlərini artırır.
