Azərbaycanda bir sıra icbari sığorta növləri üzrə dəyişikliklərin həyata keçirilməsi planlaşdırılır.
Bunu Azərbaycan Mərkəzi Bankının baş direktoru Vüsal Qurbanov XI Azərbaycan Beynəlxalq Sığorta Forumunda (AIIF-2026) jurnalistlərə açıqlamasında deyib.
O qeyd edib ki, icbari fərdi qəza sığortasına aid sığorta növlərinin yenilənməsi ilə bağlı işlər görülür: "Biz həm beynəlxalq təcrübəni öyrənirik, həm də bu nüansları hazırlanan konsepsiya çərçivəsində nəzərə almışıq."
İcbari avtosığorta sahəsində də qanunvericiliyə müəyyən dəyişikliklərin edilməsi nəzərdə tutulur. V. Qurbanov bildirib: "Həmin kateqoriyada maddi zərərə görə sığorta məbləği 5 milyon manatdır və bu limit avtomatik bərpa olunur. Yəni vətəndaşın əmlakına 5 milyon manatlıq ziyan dəysə belə, limit sıfırlanmır, yenidən eyni həddə çatdırılır."
Digər sığorta məhsullarında ödəniş edildikdən sonra ümumi sığorta limiti azalır, ancaq avtosığortada qaydalar fərqlidir: sığorta limiti daimi olaraq qorunur və eyni səviyyədə saxlanılır.
