İctimai əhəmiyyətli funksiyaları yerinə yetirən informasiya infrastrukturlarında kibertəhlükəsizlik üzrə fəaliyyət dövlət orqanının müvafiq strukturu və ya müqavilə əsasında rezident hüquqi şəxs olan CERT-lər vasitəsilə təmin ediləcək.
Oxu.Az-ın məlumatına görə, bu məsələ Milli Məclisin İnsan hüquqları komitəsinin iclasında müzakirə edilən "İnformasiya, informasiyalaşdırma və informasiyanın mühafizəsi haqqında" Qanuna təklif edilən dəyişiklik layihəsində əksini tapıb.
Layihədə qeyd olunur ki, ictimai əhəmiyyətli funksiyaları yerinə yetirən informasiya infrastrukturu obyektinə qarşı yönəlmiş kibertəhdid və kiberhücumların monitorinqi və ilkin texniki cavab tədbirləri SOC-lar tərəfindən həyata keçiriləcək.
Maliyyə bazarlarında fəaliyyətinə nəzarət edilən subyektlərin informasiya infrastrukturlarında kibertəhlükəsizlik üzrə fəaliyyət Azərbaycan Mərkəzi Bankı (AMB) tərəfindən təmin ediləcək. SOC-ların yaradılması, tənzimlənməsi və monitorinqi də AMB tərəfindən həyata keçiriləcək.
