Neft qiymətləri Yaxın Şərq münaqişəsində gərginliyin azalması gözləntiləri fonunda mayın 29-da azalır.
Bu barədə Oxu.Az "Interfax" nəşrinə istinadən məlumat verir.
Londonun "ICE Futures" birjasında iyul ayı üçün "Brent" markalı neftin füçersləri Bakı vaxtı ilə saat 9:10-a olan məlumata görə, bir barel üçün 92.56 dollar təşkil edib ki, bu da əvvəlki günün yekun qiymətindən 1.15 dollar (1,23%) azdır. Mayın 28-də isə füçerslər 0.58 dollar (0.6%) azalaraq, bir barel üçün 93.71 dollara düşüb.
Bu gün daha aktiv ticarət edilən avqust füçersləri isə 0.95 dollar (1.02%) azalaraq, bir barel üçün 91.75 dollar dəyərində alqı-satqı edilir.
Nyu-York Ticarət Birjasının (NYMEX) elektron ticarət meydançasında iyul ayı üçün WTI markalı neft füçersləri 1.14 dollar (1.28%) azalaraq, bir barel üçün 87.76 dollara düşüb. Onların qiyməti əvvəlki sessiyanın yekunları üzrə 0.22 dollar (0.3%) artaraq, bir barel üçün 88.9 dollara çatmışdı.
