Azərbaycan meyvə-tərəvəz və bostan məhsulları üzrə özünü tam təmin edir. Bu məhsullar aqrar ixracda da mühüm rol oynayır.
İqtisadi İslahatların Təhlili və Kommunikasiya Mərkəzinin icraçı direktorunun müavini Ramil Hüseyn Oxu.Az-a bildirib ki, yeni Dövlət Proqramı (2026-2030) meyvə-tərəvəz sektorunun inkişafına töhfə verəcək.
Proqram çərçivəsində intensiv və superintensiv meyvə bağlarının sahəsi 20 min hektar, müasir istixana komplekslərinin həcmi isə 500 hektar artırılacaq. Bu, məhsuldarlığı yüksəldəcək və ixrac potensialını genişləndirəcək.
2025-ci ildə qeyri-neft ixracının ilk onluğunda kənd təsərrüfatı məhsulları üstünlük təşkil edib. Pomidor (193 milyon dollar), fındıq ləpəsi (170 milyon), pambıq mahlıcı (160 milyon), xurma (144 milyon) və şaftalı (111 milyon) ixrac olunub.
Proqramda 170 min hektar sahəyə müasir suvarma sistemlərinin tətbiqi hədəflənir. Bu, su ehtiyatlarından səmərəli istifadə və rəqabət üstünlüyü yaradacaq.
Qeyd edək ki, investisiyaların 63 faizi özəl sektor tərəfindən reallaşdırılacaq. Dövlət özəl sektorun aktiv rol almasını təşviq edir.
