Qazaxıstan energetika naziri Yerlan Akkenjenov BTC-nin ölkəsi üçün əhəmiyyətindən danışıb.
Bakı Enerji Forumunda çıxış edən nazir bildirib ki, Xəzər neftinin beynəlxalq bazarlara çıxarılması üçün daha çox alternativ marşrutlara ehtiyac var.
"BTC-yə qoşulmuşuq və ondan istifadə etməmək rasional olmazdı. Artıq mövcud infrastrukturdan tam gücü ilə istifadə edirik" - deyə Akkenjenov vurğulayıb.
Nazir qeyd edib ki, Qazaxıstan neftinin təxminən 80 faizini ixrac edir, əsas istiqamətlərdən biri Avropa bazarıdır. BTC sistemi burada mühüm rol oynayır, çünki onun ötürmə qabiliyyəti təxminən 25 milyon tondur. Qazaxıstan yaxın gələcəkdə bu əlavə imkanlardan istifadə etməyi planlaşdırır.
