Azərbaycan Dövlət Neft Şirkətinin (SOCAR) prezidenti Rövşən Nəcəf İtaliyaya səfəri çərçivəsində bir sıra görüşlər keçirib. O, həmçinin 28 May - Müstəqillik Günü münasibətilə Romada təşkil olunan rəsmi qəbulda iştirak edib.
R. Nəcəf İtaliyanın ətraf mühit və enerji təhlükəsizliyi naziri Gilberto Piçetto Fratin, həmçinin müəssisələr və 'Made in Italy' naziri Adolfo Urso ilə görüşüb. Görüşlərdə Azərbaycan-İtaliya iqtisadi əməkdaşlığının enerji sektorunda dayanıqlı inkişafı vurğulanıb.
SOCAR tərəfindən 'Italiana Petroli' şirkətinin səhmlərinin alınması bu əməkdaşlığın genişlənməsində mühüm addım kimi qeyd olunub. Görüşlərdə enerji təhlükəsizliyi və qarşılıqlı maraq doğuran məsələlər müzakirə edilib.
SOCAR prezidenti Azərbaycan səfirliyinin təşkil etdiyi rəsmi qəbulda iştirak edib. Tədbir çərçivəsində 'SOCAR İtaliya' şirkətinin rəsmi təqdimatı olub. Rövşən Nəcəf çıxışında Heydər Əliyevin əsasını qoyduğu müstəqil Azərbaycanın Prezident İlham Əliyevin rəhbərliyi ilə inkişaf yolundan danışıb.
O, SOCAR İtaliya şirkətinin fəaliyyətə başlamasının və 'Italiana Petroli' səhmlərinin alınmasının ölkələr arasındakı uğurlu əməkdaşlığın göstəricisi olduğunu bildirib. Tədbirdə Azərbaycanın İtaliyadakı səfiri Rəşad Aslanov, İtaliya xarici işlər nazirinin müavini Edmondo Cirielli və senator Licia Ronzulli də çıxış edib.
