2026-2030-cu illər üçün Dövlət Proqramı çərçivəsində bitkiçilikdə məhsuldarlığın artırılması, intensiv istehsalın genişləndirilməsi və müasir aqrar infrastrukturun formalaşdırılması nəzərdə tutulur.
Oxu.Az AZƏRTAC-a istinadən xəbər verir ki, bu barədə kənd təsərrüfatı naziri Məcnun Məmmədov Zəngilanda keçirilən regional müşavirədə bildirib.
Nazir qeyd edib ki, strateji məhsullar üzrə məhsuldarlığın əhəmiyyətli dərəcədə artırılması hədəflənir. İxtisaslaşmış rayonlarda buğda və pambıq üzrə məhsuldarlığın hər hektardan 50 sentnerə çatdırılması planlaşdırılır.
Proqram çərçivəsində buğda istehsalının təxminən 20%, pambıq emalı məhsullarının istehsalının isə 4 dəfə artırılması nəzərdə tutulur.
Yüksək məhsuldarlığa malik intensiv və superintensiv bağların sahəsinin əlavə 20 min hektar artırılması da prioritetdir.
"İstixana təsərrüfatlarının inkişafı diqqət mərkəzindədir. Ölkədə istixana sahələrinin 2030-cu ilədək 2 min hektara çatdırılması və Şərqi Zəngəzur iqtisadi rayonunda pilot istixana aqroparkının yaradılması nəzərdə tutulur", - deyə nazir vurğulayıb.
Bu tədbirlər daxili bazarın təminatını gücləndirəcək, ixrac potensialını artıracaq və aqrar sahədə müasir texnologiyaların tətbiqini genişləndirəcək.
