SOCAR-ın Təlim, Tədris və Sertifikatlaşdırma İdarəsi yeni brend adını təqdim edib.
Oxu.Az xəbər verir ki, qurum bundan sonra Xəzər Təlim və Sertifikatlaşdırma Mərkəzi (Caspian Training and Certification Center - CTCC) adı altında fəaliyyət göstərəcək.
Təqdimat mərasimində dövlət qurumlarının nümayəndələri, sənaye və enerji sahəsində tərəfdaş şirkətlərin rəhbərləri, həmçinin müxtəlif sahə mütəxəssisləri iştirak ediblər.
Əvvəlcə Mərkəzin fəaliyyətini əks etdirən videoçarx nümayiş olunub.
Tədbirdə qonaqlara CTCC-nin fəaliyyət istiqamətləri, beynəlxalq standartlara uyğun təlim proqramları, sertifikatlaşdırma imkanları və texniki infrastruktur barədə məlumat verilib.
Panel müzakirəsində Fövqəladə Hallar Nazirliyi, Azərbaycan Sənaye Təhlükəsizliyi Assosiasiyası, SOCAR Downstream, bp Azerbaijan və CTCC rəhbərləri çıxış ediblər.
Müzakirələr insan kapitalının inkişafı, beynəlxalq təcrübələrin tətbiqi və ixtisaslı kadr hazırlığının strateji əhəmiyyəti mövzularında aparılıb.
