Xudat şəhəri və ətraf ərazilərdə kənd təsərrüfatı və aqrobizneslə məşğul olan sahibkarların işi daha da asanlaşacaq.
Oxu.Az xəbər verir ki, dövlət xidmətlərinə çıxış imkanlarının genişləndirilməsi, regionlarda xidmətlərin əlçatanlığının artırılması və aqrar sahədə fermerlərin müraciət prosesinin asanlaşdırılması üçün tədbirlər davam edir. Bu məqsədlə KOB evlərində xidmət çeşidi genişləndirilir.
"Xaçmaz KOB evi"nin Xudat Xidmət Mərkəzində ("Foodcity Aqroparkı"nda) Kənd Təsərrüfatı Nazirliyinin xidmət masası fəaliyyətə başlayıb. Məqsəd aqrar sahədə sahibkarlara operativ, şəffaf və əlçatan xidmət göstərmək, subsidiya mexanizmləri üzrə müraciəti sürətləndirmək və fermerlərin məlumatlandırılmasını artırmaqdır. Xidmət masası subsidiyalara dair müraciətləri qəbul edəcək, ilkin məlumatlandırma və digər dəstək xidmətləri göstərəcək.
Bu, Xudat və ətraf bölgələrdə yaşayan kənd təsərrüfatı və aqrobiznes sahibkarlarının işini asanlaşdıracaq. Vətəndaşlar və fermerlər subsidiya xidmətləri ilə bağlı müraciətlərini rayon mərkəzlərinə getmədən birbaşa Xudatda həyata keçirə biləcəklər. Bu, vaxt itkisini minimuma endirəcək və dövlət xidmətlərindən istifadəni daha rahat edəcək.
Qeyd edək ki, 2026-cı ilin yanvar-aprel aylarında "Xaçmaz KOB evi"nin Xudat Xidmət Mərkəzi tərəfindən sahibkarlara 18 minə yaxın xidmət göstərilib.
Hazırda KOB evləri Bakı, Gəncə, Xaçmaz, Yevlax və Şuşa şəhərlərində fəaliyyət göstərir. Ümumilikdə KOB evlərində sahibkarlara 35 dövlət qurumu tərəfindən 300-dən çox "G2B" və 13 özəl təşkilat tərəfindən 160 "B2B" xidmət təqdim olunur.
