Ağdərə şəhərində Əlaqələndirmə Qərargahının növbəti iclası keçirilib. İclasa Prezident Administrasiyasının və işğaldan azad edilmiş ərazilərdə məsələlərin mərkəzləşdirilmiş qaydada həlli ilə bağlı Qərargahın rəhbəri Samir Nuriyev sədrlik edib.
Samir Nuriyev Prezident İlham Əliyevin rəhbərliyi ilə həyata keçirilən siyasətin ölkənin hərtərəfli inkişafının əsasını təşkil etdiyini bildirib. O vurğulayıb ki, qəbul edilən strateji sənədlər və islahatlar sosial-iqtisadi inkişafın vahid yanaşma əsasında təmin olunduğunu təsdiqləyir.
Böyük Qayıdış prosesi milli inkişaf strategiyasının əsas istiqamətlərindəndir. İşğaldan azad edilmiş ərazilərdə genişmiqyaslı bərpa-quruculuq işləri nəticəsində zəruri infrastruktur qurulub. Hazırda əsas prioritet dayanıqlı iqtisadi inkişafın təmin olunmasıdır.
Böyük Qayıdışa dair I Dövlət Proqramının icrası yekunlaşmaq üzrədir. II Dövlət Proqramının hazırlanması istiqamətində intensiv iş aparılır.
Samir Nuriyev işğaldan azad edilmiş ərazilərin aqrar potensialının əhəmiyyətini vurğulayıb. Torpaq və su ehtiyatlarından səmərəli istifadə, aqrar istehsalın genişləndirilməsi və dayanıqlı məşğulluğun təmin olunması qarşıdakı dövrün əsas vəzifələrindəndir.
İclasda ekoloji dayanıqlılıq və su ehtiyatlarının idarə olunması məsələlərinə də toxunulub. Təbii ehtiyatlardan səmərəli istifadə və ekosistemlərin bərpası uzunmüddətli inkişafın mühüm şərtlərindəndir.
İclasın yekununda strateji hədəflərə uyğun olaraq, işğaldan azad edilmiş ərazilərin inteqrasiyasının sürətləndirilməsi və Böyük Qayıdış prosesinin dayanıqlılığının təmin olunmasının vacibliyi vurğulanıb.
Daha sonra iştirakçılar Ağdərə şəhərinin Baş planı ilə tanış olub, aqrar və sənaye layihələrinə baxış keçiriblər.
