Avropa Parlamentinin bir qrup deputatı təşkilatın Azərbaycanla əməkdaşlığı dayandırmasına səbəb olan hərəkətlərini tənqid ediblər.
Oxu.Az "Report"a istinadən xəbər verir ki, dünən axşam Strasburqda Avropa Parlamentinin plenar iclasının sonunda Azərbaycan Milli Məclisinin Avropa Parlamenti ilə əməkdaşlığı dayandırmaq və Avronestdən çıxmaq barədə qərarı gündəliyə çıxarılıb.
Xüsusilə, Avropa Parlamentinin Avronetdəki nümayəndə heyətinin rəhbəri Sergey Laqodinski Bakını çıxma qərarını yenidən nəzərdən keçirməyə çağırıb. O qeyd edib ki, ölkə "Şərq tərəfdaşlığı" çərçivəsində regional dialoqun mühüm hissəsi olaraq qalır.
Deputat Kristian Terheş isə daha sərt çıxış edərək Avropa Parlamentini ittiham edib: "Bu parlament aprel qətnaməsini Azərbaycana hücum etmək üçün istifadə etdi. Bu, tamamilə lazımsız, ağılsız və əks-məhsuldar idi".
"Patriots for Europe" qrupundan Anjelin Füre bildirib: "Biz sizin müdaxiləniz və Ermənistana münasibətdə yanaşmamızın bədəlini ödəyirik".
Deputat Tyerri Mariani qeyd edib: "Qafqazda sülhə Avropa Parlamentinin müdaxiləsi ilə deyil, regiondakı danışıqlar yolu ilə nail olunacaq".
