Azərbaycan və Sudan diplomatik pasport sahibləri üçün viza rejimini ləğv edib. Bu barədə Xarici İşlər Nazirliyi məlumat yayıb.
Mayın 19-da Azərbaycanın xarici işlər naziri Ceyhun Bayramov Sudanın xarici işlər naziri Mohieddin Salem Ahmed İbrahim ilə görüşüb. Görüşdə siyasi, iqtisadi, humanitar və çoxtərəfli əməkdaşlıq müzakirə olunub.
Tərəflər gələn il diplomatik münasibətlərin 35 illiyini qeyd edəcəklər. Enerji təhlükəsizliyi, yaşıl enerji, kənd təsərrüfatı, investisiya, təhsil və humanitar sahələrdə əməkdaşlıq imkanları nəzərdən keçirilib.
Sudan tərəfi Azərbaycanın dövlət idarəçiliyi, rəqəmsal inkişaf, infrastruktur və post-münaqişə bərpa təcrübəsinə maraq göstərib. Azərbaycan isə Sudanlı tələbələrə təhsil təqaüdü ayırıb.
Görüşün sonunda diplomatik pasport sahiblərinin vizadan qarşılıqlı azad edilməsi haqqında saziş imzalanıb.
