Dünyanın müxtəlif yerlərindən insanlar Bakıya gəlib, müstəmləkəçilik və mənzil problemi kimi ciddi problemləri müzakirə edirlər.
Oxu.Az xəbər verir ki, bunu Sent-Vinsent və Qrenadin hökumət başçısının müşaviri Riçard Bayron-Koks Bakıda keçirilən Ümumdünya Şəhərsalma Forumunun 13-cü sessiyası çərçivəsində (WUF13) Bakı Təşəbbüs Qrupunun (BTQ) təşəbbüsü ilə "Dekolonizasiya prosesində gənclərin şəhərsalmada rolu" mövzusunda keçirilən beynəlxalq konfransda jurnalistlərə açıqlamasında deyib.
O bildirib ki, konfransda problemin ədalətli şəkildə necə həll olunacağı müzakirə edilir: "Azərbaycan ona görə vacibdir ki, kimsə insanları bir araya gətirməli idi və Bakı bunu bacarır, insanları birləşdirir. Həmçinin başa düşməliyik ki, dünya problemlərlə doludur, bir çox yerdə, xüsusilə müstəmləkəçilik keçmişi olan ölkələrdə qarşılaşdığımız problemlərdən biri də mənzil məsələsidir. Mənzil problemini həll etmək isə sadə bir iş deyil. Çünki, birincisi, mənzil tikmək üçün pul, ikincisi, torpaq, üçüncüsü təcrübə, dördüncüsü, bütün bu resursları bir araya gətirmək qabiliyyəti lazımdır. Yəni mənzil problemini həll etmək sadə bir iş deyil. Amma bundan əlavə, başa düşmək lazımdır ki, bu ölkələrin əksəriyyəti müstəmləkə ölkələri olub. Yəni ölkələr başqalarının maraqları üçün idarə olunurdu. Bir ölkə müstəmləkə olanda, xaricdən idarə edilir. Bütün bu problemlərin həlli Bakıda müzakirə olunur."
