Boneyr İnsan Hüquqları Təşkilatının üzvü Finies Kristian deyir: "Dekolonizasiya insanları sistemlərdən üstün tutmaq deməkdir".
Bu fikirlər Bakı Təşəbbüs Qrupunun təşkilatçılığı ilə "Dekolonizasiya prosesində gənclərin şəhərsalmada rolu" mövzusunda keçirilən beynəlxalq konfransda səsləndirilib.
Kristian iqlim dəyişikliyinin xüsusilə həssas məsələ olduğunu vurğulayıb: "Dənizlərdə yaranan problem, temperatur artımı və ekoloji təzyiqlər gələcəyimizi təhlükə altına alır. Gənclər qərar masasında yer almalıdır".
O, inkişafın insan hüquqlarına əsaslanan, dayanıqlı, inklüziv və insanmərkəzli olmasını tələb edib: "Münasib mənzil siyasətləri, bərabər təhsil imkanları, yerli torpaq mülkiyyəti hüquqlarının qorunması, icma mülkiyyətinə investisiya, mədəni irsin qorunması və qərarların qəbulunda mənalı iştirak vacibdir".
Kristian BMT-nin CESCR hesabatına istinad edərək insan hüquqlarının hər yerdə eyni tətbiq olunmalı olduğunu bildirib: "Bir gənc olaraq bərabərsizliyi miras almaq istəmirəm. BMT konvensiyaları deyir: heç kim geridə qalmayacaq".
O, gənclərin hələ də müstəmləkəçi idarəetmə altında qalmasını ədalətsizlik adlandırıb: "Dekolonizasiya insanları sistemlərdən üstün tutmaq, icmaları mənfəətdən üstün tutmaq və gəncləri qərarvermənin mərkəzinə yerləşdirmək deməkdir".
