Nazirlər Kabineti "Ümumi istifadədə olan dəmiryol nəqliyyatının infrastrukturunun saxlanması və ondan istifadə" Qaydalarını təsdiq edib.
Oxu.Az xəbər verir ki, bununla bağlı Baş nazir Əli Əsədov yeni qərar imzalayıb.
Qərara əsasən, infrastrukturun saxlanmasını və ondan istifadənin idarə olunmasını Rəqəmsal İnkişaf və Nəqliyyat Nazirliyinin, eləcə də AZCON-un təklifləri nəzərə alınmaqla infrastruktur sahibi həyata keçirir.
Dəmiryol nəqliyyatında təhlükəsizliyi təmin etmək üçün infrastruktur texniki cəhətdən saz vəziyyətdə olmalı, texniki baxışlar keçirilməli, təmir rejimlərinə və istismar qaydalarına riayət olunmalıdır.
Ağıllı nəqliyyat sistemləri, rəqəmsal dispetçer idarəetməsi və avtomatlaşdırılmış monitorinq vasitələri tətbiq edilə bilər.
İnfrastrukturun saxlanması infrastruktur sahibinin təsərrüfat fəaliyyətindən əldə olunan vəsaitlər və digər mənbələr hesabına həyata keçirilir.
İnfrastrukturdan bərabər, maneəsiz və ayrı-seçkilik qoyulmadan istifadə imkanı təmin edilməlidir.
Qeyri-ümumi istifadəli dəmiryol xətlərindən ümumi istifadədə olan dəmiryol xətlərinə çıxış ADY ilə razılaşdırılır.
İnfrastrukturdan istifadəyə görə xidmətlər müqavilə əsasında göstərilir.
İstifadəçilər qaydalara əməl etməli, ödənişləri vaxtında həyata keçirməli və zəruri məlumatları təqdim etməlidir.
