Ermənistanda keçirilən seçkinin nəticəsi bir daha göstərdi ki, ölkədə sülhə və sabitliyə maraq artır. Bu nəticənin formalaşmasına təsir edən əsas amillərdən biri regionda yaranan yeni reallıqlardır.
Bu sözləri Oxu.Az-a açıqlamasında Milli Məclisin deputatı Aydın Hüseynov deyib.
O bildirib ki, Azərbaycanın ərazi bütövlüyünü, suverenliyini təmin etməsi, hərbi, siyasi və diplomatik uğurları bölgədə fərqli vəziyyət formalaşdırıb:
"Bu dəyişikliklər Ermənistan siyasi dairələrini və cəmiyyətini daha realist yanaşmağa sövq edib. Nəticədə sülh, sərhədlərin tanınması və qonşularla normal münasibətlərin qurulması ön plana çıxdı. 44 günlük müharibədən sonra qalib tərəf olmasına baxmayaraq, Azərbaycan dərhal sülh danışıqlarına başlamağı təklif etdi. Bunun üçün tərəflər arasında münasibətlərin normallaşmasına xidmət edən baza prinsipləri irəli sürüldü. Ermənistan hökumətinin sülh gündəliyinin irəliləməsində də Azərbaycanın mövqeyi və Prezident İlham Əliyevin həyata keçirdiyi siyasət mühüm rol oynadı. Son illərdə aparılan danışıqlar və görüşlər tərəflər arasında etimadın artmasına müəyyən töhfə verdi. Xüsusilə Vaşinqtonda keçirilən görüşlərdən sonra iki ölkə arasında münasibətlərin normallaşmasına yönəlmiş bir sıra məsələlər daha çox müzakirə olunmağa başladı. Bura sərhəddə təhlükəsizliyin və sabitliyin təmin olunması, nəqliyyat və kommunikasiya əlaqələrinin bərpası, regional ticarət imkanlarının genişləndirilməsi və tranzit daşımaların inkişafı daxildir."
"Bundan başqa, iqtisadi əməkdaşlıq imkanları, enerji təhlükəsizliyi sahəsində perspektivlər, vətəndaş cəmiyyəti nümayəndələrinin görüşləri və qarşılıqlı səfərlərin təşviqi də sülh prosesinin vacib elementləri kimi qiymətləndirilir. Eyni zamanda, qarşılıqlı ittihamların və aqressiv ritorikanın azalması regionda etimad mühitinin formalaşmasına kömək edə bilər. Bu isə uzunmüddətli sülh və əməkdaşlıq üçün mühüm şərtlərdən biridir.
Ümumilikdə, seçkilərin nəticəsi Ermənistan cəmiyyətinin bölgədə yaranmış yeni reallıqları nəzərə aldığını və Azərbaycanla sülhün alternativsiz olduğunu daha yaxşı dərk etməyə başladığını göstərən amillərdən biri kimi qiymətləndirilə bilər", - deyə deputat vurğulayıb.
