Ermənistanda parlament seçkisi kampaniyasında diqqətçəkən məqamlardan biri proses boyunca Ermənistanın özündən çox Azərbaycanın və Prezident İlham Əliyevin siyasətinin müzakirə olunmasıdır. Bu fikirləri Oxu.Az-a açıqlamasında deputat Vasif Qafarov deyib.
O bildirib ki, debatlar, siyasi aksiyalar və namizədlərin çıxışları göstərir ki, bu gün regionun siyasi gündəliyini müəyyən edən əsas aktyor Azərbaycandır. Ermənistan siyasi dairələri və müxtəlif xarici mərkəzlər də yaxşı anlayırlar ki, Azərbaycanın maraq və mövqeyi nəzərə alınmadan regionda hər hansı siyasi layihənin uğur qazanması mümkün deyil.
Deputat qeyd edib ki, qarşıdakı seçkilər təkcə hakimiyyət uğrunda mübarizə deyil, Ermənistan cəmiyyəti sülhlə revanşizm arasında seçim edir. Azərbaycan üçün əsas məsələ konkret siyasi qüvvənin hakimiyyətə gəlməsi deyil, Ermənistan xalqının hansı strateji yolu seçəcəyidir. Son illərdə regionda formalaşan yeni reallıqlar göstərir ki, inkişafın yeganə yolu sülhdən keçir və bu sülh gündəliyinin təşəbbüskarı Azərbaycandır.
V.Qafarov əlavə edib ki, seçki kampaniyasının gedişi göstərir ki, Qarabağ mövzusu yenidən bəzi siyasi qüvvələrin əsas alətinə çevrilir. Müxtəlif namizədlərin və revanşist dairələrin bu mövzunu yenidən gündəmə gətirməsi göstərir ki, Ermənistan cəmiyyətində separatizm ideologiyasından tam imtina edilməyib.
Deputat bildirib ki, rəsmi Bakı seçkilərdən sonra Ermənistanın əsas qanununda dəyişikliklərin həyata keçirilməsini gözləyir. Azərbaycanın digər mühüm gözləntisi isə Qarabağ adı altında fəaliyyət göstərən bütün strukturların birdəfəlik ləğv edilməsidir. Seçkilər fonunda diqqət çəkən digər məqam Qərbin ikili standartlarıdır.
