Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov Kamboca Krallığına işgüzar səfəri zamanı bir sıra yüksək səviyyəli görüşlər keçirib.
Görüşlər zamanı dövlət başçısı səlahiyyətlərini icra edən, Senatın sədri Hun Sen, Baş nazir Hun Manet, Baş nazirin müavini, xarici işlər naziri Prak Sokhonn, Milli Assambleyanın sədri Xon Sodari və digər rəsmi şəxslərlə ikitərəfli əlaqələr müzakirə olunub.
Hun Sen Azərbaycana səfərini məmnunluqla xatırlayaraq Prezident İlham Əliyəyə salamlarını çatdırıb. O, Azərbaycanı yaxın dost ölkə kimi qiymətləndirib və yenidən səfər etmək niyyətini bildirib.
Baş nazir Hun Manetə oktyabrda Bakıda keçiriləcək AQEM Zirvə Görüşünə dəvət məktubu təqdim olunub. Dəvət məmnuniyyətlə qarşılanıb.
Tərəflər ticarət, iqtisadiyyat, enerji, nəqliyyat, kənd təsərrüfatı, turizm, təhsil və ekologiya sahələrində əməkdaşlığın genişləndirilməsini müzakirə ediblər. Kamboca tərəfi Azərbaycanın regional və beynəlxalq rolunu yüksək qiymətləndirib.
Elçin Əmirbəyov Azərbaycan-Ermənistan normallaşması, minatəmizləmə və bərpa işləri barədə məlumat verib. Kamboca tərəfi sülh səylərini dəstəklədiyini bildirib.
Səfər çərçivəsində Milli Diplomatiya İnstitutunda çıxış və TVK kanalına müsahibə də olub.
