Ermənistanda yaxınlaşan seçki ölkənin daxili siyasi gündəmini yenidən aktivləşdirib.
Bu fikirləri Oxu.Az-a açıqlamasında Milli Məclisin deputatı Müşfiq Cəfərov deyib.
O bildirib ki, seçki ərəfəsində müxtəlif siyasi qüvvələr və ekspertlər prosesə xarici təsirlərin olmasıyla bağlı iddialar irəli sürürlər.
Xüsusilə Rusiyanın mümkün rolu geniş müzakirə olunur. Hesab edilir ki, Moskva seçkinin nəticələrinə təsir göstərmək üçün Rusiyada yaşayan erməni icmasının imkanlarından istifadə edə bilər. Bəli, Ermənistan seçki ərəfəsində Qərblə Rusiya arasında kəskin geosiyasi rəqabət meydanına çevrilir. Baş nazir Nikol Paşinyanın rəhbərlik etdiyi hökumət Aİ-yə inteqrasiya və ABŞ ilə əməkdaşlığı dərinləşdirməyə çalışsa da, əsas müxalifət qrupları Rusiyaya sıx bağlılıq nümayiş etdirirlər.
Bir sözlə, Ermənistan Qərb və Rusiyanın top oynadığı futbol meydançasını xatırladır. Hazırda ölkənin beynəlxalq geopolitik güclərin oyun məkanına çevrilməsi bu dövlətin düşdüyü rəzil vəziyyətin növbəti göstəricilərindən biridir. Burada artıq Ermənistanın suveren əraziləri anlayışından da söhbət gedə bilməz. Çünki Ermənistanda həm Rusiyaya, həm də Qərbə meyilli qüvvələr mübarizə aparırlar. Bu gün beynəlxalq güclərin Ermənistanı öz poliqonlarına çevirməsi rəsmi İrəvanın olmayan dövlətçilik modelinin daha da çürüməsinə səbəb olacaq.
