Ermənistanda parlament seçkisi ərəfəsində maraqlı tendensiya müşahidə olundu. Ölkənin sosial-iqtisadi problemlərindən daha çox Azərbaycanla bağlı mövzular müzakirə edildi.
Deputat Vüqar İskəndərov Oxu.Az-a bildirib ki, debatlarda, mitinqlərdə və siyasi çıxışlarda Azərbaycanın adı mütəmadi çəkildi, Prezident İlham Əliyevin siyasəti ətrafında çıxışlar üstünlük təşkil etdi.
Bu gün Cənubi Qafqazın siyasi gündəliyini müəyyən edən əsas ölkə Azərbaycandır. Regionda həyata keçirilən istənilən layihə, təhlükəsizlik təşəbbüsü Azərbaycanın maraqları nəzərə alınmadan uğur qazana bilmir.
Azərbaycanın seçki ilə bağlı gözləntisi Ermənistanın daxili siyasi proseslərinə müdaxilə etmək deyil. Ermənistan xalqı seçimi özü etməlidir. Lakin söhbət Ermənistanın gələcək kursundan gedir.
Regionun əsas gündəliyi sülhdür. Sülh prosesinin təşəbbüskarı və arxitektoru Azərbaycandır. Ermənistan seçicisi iki fərqli yol arasında seçim edir: bir tərəfdə əməkdaşlıq və sülh, digər tərəfdə müharibə ritorikası və revanşist çağırışlar.
Əgər Ermənistan sülh istədiyini iddia edirsə, bunu seçkidə nümayiş etdirməlidir. Əks halda, xarici mərkəzlərin alətinə çevrilmək və yeni qarşıdurma gündəmini dəstəkləmək Ermənistan cəmiyyətinin öz seçimi olacaq.
Seçki kampaniyasında Qarabağ mövzusu yenidən əsas siyasi alətlərdən birinə çevrilib. Revanşçı qruplar bu mövzunu yenidən gündəmə gətirməyə çalışırlar. Xaricdə də oxşar proseslər müşahidə olunur.
Azərbaycan üçün əsas məsələ Ermənistanın daxili siyasi düzəni deyil. Gözlənti sadədir: Ermənistanda ölkəmizə qarşı ərazi iddiası hüquqi sənədlərdən çıxarılmalıdır. Bunun ən etibarlı yolu yeni konstitusion dəyişikliklərdir.
Ermənistan seçicisi bu seçkidə yalnız parlament formalaşdırmır, həm də ölkəsinin gələcəkdə sülh və ya qarşıdurma kursunu müəyyən edir. Sülh prosesinin səmimiliyini göstərən əsas addımlardan biri qondarma "Qarabağ nümayəndəlikləri"nin tamamilə ləğv edilməsidir.
Əgər Ermənistan rəhbərliyi münaqişə səhifəsinin bağlandığını bəyan edirsə, Fransa, ABŞ, Rusiya və digər ölkələrdə fəaliyyət göstərən analoji qurumların fəaliyyətinin dayandırılmasına nail olmalıdır.
Seçki fonunda inzibati resurslardan istifadə, təzyiqlər, səslərin pulla alınması ilə bağlı ittihamlar səslənir. Həm Qərb, həm də Rusiya seçki prosesinə təsir göstərməyə çalışır. Lakin beynəlxalq qurumlar bu proseslərə münasibətdə səssiz qalırlar.
Ermənistanda seçki təkcə hakimiyyət uğrunda mübarizə deyil, ölkənin strateji kursunun müəyyənləşəcəyi siyasi mərhələdir. Ermənistan cəmiyyətinin qarşısında duran əsas seçim: sülh və əməkdaşlıq, yoxsa revanşizm və keçmişə qayıdış.
